ಹಿಂದೂ ದೇವರ ರೀತಿಯಲ್ಲಿ ಇಮ್ರಾನ್ ಖಾನ್ ಫೋಟೊ: ತನಿಖೆ ನಡೆಸುತ್ತಿರುವ ಪಾಕ್ ಸರಕಾರ!
ನ್ಯೂಸ್ ಕನ್ನಡ ವರದಿ-(12.04.18): ಪಾಕ್ ಮಾಜಿ ಕ್ರಿಕೆಟಿಗ ಮತ್ತು ಪಾಕಿಸ್ಥಾನ್‌ ತೆಹರೀಕ್‌ ಎ ಇನ್ಸಾಫ್ (ಪಿಟಿಐ) ಪಕ್ಷದ ಮುಖ್ಯಸ್ಥರಾಗಿರುವ ಇಮ್ರಾನ್ ಖಾನ್ ಅವರನ್ನು ಹಿಂದೂ ದೇವರಂತೆ ಕಾಣಿಸುವ ಫೋಟೋ ಸಾಮಾಜಿಕ ಮಾಧ್ಯಮದಲ್ಲಿ ಹರಿದಾಡುತ್ತಿದ್ದು ಸಾಕಷ್ಟು ವಿವಾದಕ್ಕೆ ಕಾರಣವಾಗಿದೆ.
ಪಾಕ್ ರಾಷ್ಟ್ರೀಯ ಅಸೆಂಬ್ಲಿಯಲ್ಲಿ ಹಿಂದೂ ಶಾಸಕ ರಮಶ್‌ ಲಾಲ್‌ ಅವರು ಈ ವಿಷಯವನ್ನು ಈಚೆಗೆ ಎತ್ತಿದ್ದರು. ಪರಿಣಾಮವಾಗಿ ಸಾಮಾಜಿಕ ಮಾಧ್ಯಮಗಳಲ್ಲಿ ಹರಿಯಬಿಡಲಾಗಿರುವ ಈ ವಿವಾದಾತ್ಮಕ ಫೋಟೋಗಳ ಹಿಂದಿರುವವರನ್ನು ಬಂಧಿಸಿ ಕಾನೂನು ಪ್ರಕಾರ ಶಿಕ್ಷಿಸಲು ದೇಶದ ಒಳಾಡಳಿತ ಸಚಿವಾಲಯಕ್ಕೆ ಸೂಚಿಸಲಾಗಿರುವುದಾಗಿ ತಿಳಿದು ಬಂದಿದೆ.
ಇಮ್ರಾನ್ ಖಾನ್ ಅವರನ್ನು ಹಿಂದೂ ದೇವರಂತೆ ಕಾಣಿಸುವ ಫೋಟೋಗಳನ್ನು ಬಳಸಿಕೊಂಡು ಮಾಡಲಾಗುತ್ತಿರುವ ದ್ವೇಷಯುಕ್ತ ಭಾಷಣಗಳು ಮತ್ತು ಸಾಮಾಜಿಕ ಮಾಧ್ಯಮಗಳ ಅಭಿಯಾನವನ್ನು ಹಿಂದೂ ಶಾಸಕರು ಪ್ರತಿಭಟಿಸಿದುದನ್ನು ಅನುಸರಿಸಿ ರಾಷ್ಟ್ರೀಯ ಅಸೆಂಬ್ಲಿ ಸ್ಪೀಕರ್‌ ಸರ್ದಾರ್‌ ಅಯಾಜ್‌ ಸಾದಿಕ್‌ ಅವರು ಒಳಾಡಳಿತ ಸಚಿವಾಲಯಕ್ಕೆ ಈ ವಿಷಯದ ಬಗ್ಗೆ ತನಿಖೆ ನಡೆಸುವಂತೆ ಸೂಚಿಸಿದರೆಂದು ಪಾಕಿಸ್ಥಾನದ ಡಾನ್‌ ನ್ಯೂಸ್ ವರದಿ ಮಾಡಿದೆ.
